Vazirlik mutaxassislari Turkiyada stajirovka oʻtamoqda

Oʻzbekiston Respublikasi Prezidenti huzuridagi Davlat xizmatini rivojlantirish agentligi va Turkiya Prezidenti huzuridagi Inson resurslari ofisi hamkorligida tegishli vazirlik hamda idoralarning mutaxassislari  uchun stajirovka Dasturi boʻlib oʻtmoqda. 

Agentlik, Vazirlar Mahkamasi va boshqa masʼul xodimlar ishtirok etayotgan ushbu tadbir Turkiyaning inson resurslarini boshqarish va rivojlantirishda joriy qilingan raqamli dasturlari hamda innovatsion yechimlari bilan tanishish, sohada oʻzaro tajriba almashish maqsadida tashkil etilgan. 

Ishtirokchilar orasida Qurilish va uy-joy kommunal xoʻjaligi vazirligi Inson resurslarini rivojlantirish va boshqarish boʻlimi bosh mutaxassisi Kamoliddin Xolmatov va Qurilish va uy-joy kommunal xo‘jaligi sohasida nazorat qilish inspeksiyasi bo‘lim boshlig‘i Gulbahor Mirzayevalar ham bor. Seminar davomida inson resurslarini boshqarishning zamonaviy usullari va raqamli yechimlar boʻyicha tajriba almashish,  ishga kirgan yangi xodimlarni davlat xizmatiga moslashtirish usullari, Turkiyadagi vazirlik va idoralar Inson resurslarini boshqarish departamentlari faoliyati bilan yaqindan tanishish koʻzda tutilgan. 

Maʼlumot uchun, mazkur seminar 1-7-sentabr kunlari Anqara shahrida boʻlib oʻtadi.