Qoraqalpogʻiston Respublikasi Qurilish va uy-joy kommunal xo‘jaligi sohasida hududiy nazorat qilish inspeksiyasi (MUNOSABAT)
Nukus shahri “Gulzar” MFY “Sarbinaz” turar joy massivi hududidagi “QALBAQ QURILIS” MCHJ tomonidan olib borilayotgan koʻp qavatli turar joy obyektidagi qurilish-montaj ishlari Qoraqalpogʻiston Respublikasi Qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan tegishli tartibda oʻrganib chiqildi va bu boʻyicha quyidagilar aniqlandi:
MCHJga Nukus shahri qurilish boʻlimi tomonidan 7 qavatli turar joy obyekti qurilishi uchun 2023-yil 14-aprelda ruxsatnoma berilgan va 2023-yil 26-mayda arxitektura rejalashtirish topshirigʻi hujjatlari ishlab chiqilgan. 2023-yil 24-avgustda esa hujjatlar Qoraqalpogʻiston Respublikasi Qurilish va uy-joy kommunal xo‘jaligi vazirligining Arxitektura va shaharsozlik kengashi tomonidan tasdiqlangan.
Qurilish obyektining loyiha-smeta hujjatlari ham ishlab chiqilib, “Shaharsozlik hujjatlari ekspertizasi” davlat unitar korxonasining 2023-yil 30-dekabrda xulosasi olingan.
Obyekt inspeksiya tomonidan 2024-yil 10-yanvarda roʻyxatga olingan va unda qurilish-montaj ishlari doimiy nazorat qilingan.
Bugungi kunda obyektda handaq-kotlovan qazish ishlari yakunlanib, fundamentga tayyorgarlik ishlari amalga oshirilmoqda. Umumiy qurilish-montaj ishlari 4 % ga bajarilgan.
Inspeksiya tomonidan monitoringlar davomida hozirgacha 3 marta yozma koʻrsatmalar berilgan. Bugungi kunda ham bu yozma koʻrsatmalardagi qoidabuzarliklarni bartaraf qilish ishlari amalga oshirilayotganligini maʼlum qilamiz.
