Kompetensiyani rivojlantirish instituti rektori Aʼzamiddin Qoʻldoshev qurilish sohasida hududiy nazorat inspeksiyasi, loyiha hamda pudrat tashkilotlari vakillari bilan uchrashdi
Oʻzbekiston Respublikasi Vazirlar Mahkamasining 2023-yil 11-sentabrdagi 460-sonli qarori ijrosi doirasida joriy yilning 4-noyabrida Qashqadaryo viloyati Qurilish va uy-joy kommunal xoʻjaligi bosh boshqarmasida Kompetensiyani rivojlantirish instituti rektori Aʼzamiddin Qoʻldoshev qurilish sohasida hududiy nazorat inspeksiyasi, loyiha hamda pudrat tashkilotlari vakillari bilan uchrashdi.
Muloqot davomida shaharsozlik va uy-joy kommunal xoʻjaligi sohalari mutaxassislarini davriy sertifikatlash tizimi joriy etilganligi, uning mazmun-mohiyati xususida soʻz bordi. Maʼlumki, mutaxassislarni sertifikatlash ishlarini amalga oshirish vazifasi Qurilish va uy-joy kommunal xoʻjaligi vazirligi huzuridagi Kompetensiyani rivojlantirish institutiga yuklatilgan va malaka oshirish kurslari allaqachon start olgan.
Shuningdek, uchrashuvda quyidagi yoʻnalishlar:
- texnik nazorat (umumqurilish ishlari);
- loyiha tashkilotlarining mualliflik nazoratini tashkil etish va taʼminlash;
- pudrat tashkilotlarining ichki nazorati boʻyicha oʻquv dasturlari ishlab chiqilib, nazariy, masofaviy va amaliy oʻquv mashgʻulotlari boshlanganligi toʻgʻrisida tushuntirish ishlari olib borildi.
Eslatib oʻtamiz, 2025-yil 1-yanvardan boshlab sertifikatga ega boʻlmagan mutaxassislarga xavflilik darajasi II, III va IV toifali qurilish obyektlarining, shuningdek, budjet tizimi budjetlari hisobidan moliyalashtiriladigan I toifali qurilish obyektlarining arxitektura-shaharsozlik hujjatlarini ishlab chiqish, shaharsozlik hujjatlarini ekspertizadan oʻtkazish, texnik nazoratni amalga oshirish, qurilish-montaj ishlari sifatini nazorat qilish va nazorat oʻlchovini amalga oshirish jismoniy shaxslarga koʻp kvartirali uylarning boshqaruv organlariga rahbarlik qilish taqiqlanadi.
