Andijon viloyati Qurilish va uy-joy kommunal xoʻjaligi sohasida hududiy nazorat qilish inspeksiyasi (MUNOSABAT)
“BASTION” telegram kanalida e'lon qilingan xabarda qayd etilgan holatlar boʻyicha Andijon viloyati Qurilish va uy-joy kommunal xoʻjaligi sohasida hududiy nazorat qilish inspeksiyasi tomonidan o‘rganish olib borildi.
Andijon shahar hokimining 2018-yil 20-yanvardagi qarori bilan 1-qavatda jamoat markazi boʻlgan koʻp qavatli turar-joy qurilishi uchun “Azia star premium” MCHJga 0,5775 ga yer maydoni ajratib berilgan.
Tegishli hujjatlar rasmiylashtirilgach, 2024-yil 29-fevralda obyekt inspeksiyadan ro‘yxatdan o‘tgan.
Monitoringlar davomida obyekt qurilishi uchun viloyat Qurilish bosh boshqarmasi Arxitektura va shaharsozlik kengashi ishchi organining 2021-yil 9-iyuldagi xulosasida tasdiqlangan va qurilgan 4-sonli yetti qavatli turar-joy bilan hozirgi kunda qurilishi boshlangan 5-sonli yetti qavatli turar-joyning oraliq masofasi 20 metr etib belgilangan boʻlib, joyida 17 (oʻn yetti) metr qilib bajarilayotgani aniqlangan.
Shuningdek, viloyat bosh boshqarmasi xulosasida 5-sonli binoning uzunligi 23 metr deb tasdiqlangan boʻlsa-da, joyida bino uzunligi 25,6 metr qilib loyihalangani aniqlangan.
Shu bois inspeksiya tomonidan yuqorida aniqlangan kamchiliklar bartaraf etilgunga qadar qurilishni toʻxtatish toʻgʻrisida koʻrsatma berilgan hamda hozirda qurilish-montaj ishlari vaqtinchalik toʻxtatilgan.